काठमाडौ/ संविधानसभा निर्वाचन र सरकार गठनप्रक्रियाप्रति असहमति जनाउँदै आएको संघीय समाजवादी पार्टी र उच्चस्तरीय राजनीतिक समितिबीच ५ बुँदे सहमति भएको छ ।

उच्चस्तरीय राजनितिक समितिको कार्यालय नयाँवानेश्वरमा आज बिहान भएको वार्तामा ५ बुँदे सहमतिपत्रमा हस्ताक्षर भएको हो ।

उच्चस्तरीय समितिको तर्फबाट नेपाली कांग्रेसका उपसभापति रामचन्द्र पौडेल र संघीय समाजवादी पार्टीको तर्फबाट अध्यक्ष अशोक राईले सहमति पत्रमा हस्ताक्षर गर्नुभएको छ ।  सहमतिमापत्रमा संविधानसभा सदस्य संख्या ६ सय १ बनाउन सरकार र राष्ट्रपतिलाई आग्रह गर्ने तथा विघटित संविधानसभामा सभासद भएका दलहरुको संयुक्त बैठक बोलाउन सरकारलाई आग्रह गर्ने उल्लेख छ ।

त्यस्तै विदेशमा रहेका नेपालीलाई पनि मताधिकार दिलाउन कानुनी प्रक्रिया थाल्ने, अघिल्लो संविधानसभामा भएका सहमति आगामी संविधासभामा पनि कायम गर्न पहल गर्ने र संघीय समाजवादी पार्टीले आन्दोलनका सबै कार्यक्रम फिर्ता लिई मंसिर ४ का लागि तोकिएको संविधानसभा निर्वाचनमा सहभागी हुने सहमति पत्रमा उल्लेख गरिएको छ ।

यो सहमतिसँगै संविधानसभा निर्वाचनमा सहभागी हुने दलहरुको संख्या बढेको छ । यसअघि समिति र मधेशी जनाधिकार फोरम नेपाल नेतृत्वको संघीय लोकतान्त्रिक मोर्चासँग सहमति भएको थियो । अब समिति र नेकपा–माओवादी नेतृत्वको तेत्तीस दलीय मोर्चाबीच सहमति हुन बाँकी छ । आज भएको सहमतिपछि कांग्रेस उपसभापति रामचन्द्र पौडेलले माओवादी नेतृत्वको मोर्चासँग पनि सहमतिका लागि प्रयास भइरहेको बताउँदै माओवादी पनि चुनावमा सहभागी हुने विश्वास व्यक्त गर्नुभयो ।

उच्चस्तरीय राजनीतिक समिति र सङ्घीय समाजवादी पार्टी, नेपालबिच भएको सहमति

नेपाल सरकारद्वारा घोषित दोश्रो संविधान सभाको निर्वाचनलाई सुनिश्चित गर्दै उच्च स्तरीय राजनीतिक समिति र सङ्घीय समाजवादी पार्टी, नेपालबिच देहाय बमोजिम सहमति भएको छ –

१. सम्बत २०६९ साल फागुन ३० गते भएको ११ बुँदे राजनीतिक सहमति र त्यसपछि नेपाल सरकारको सिफारिसमा नेपालको अन्तरिम संविधान–२०६३ बमोजिम जारी भएको बाधा अड्काउ फुकाउ आदेशमा जुनसुकै कुरा लेखिएको भए तापनि संविधान सभाको दोस्रो निर्वाचनका लागि संविधान सभाको सदस्य सङ्ख्या, अनुपात र प्रतिनिधित्व २०६४ सालको संविधान सभाको निर्वाचनमा कायम रहे अनुरूप संविधानको धारा ६३ को उपधारा ३ बमोजिम गर्न सम्माननीय राष्ट्रपति र नेपाल सरकार, मन्त्रिपरिषदलाई अनुरोध गर्ने ।

२. संविधान सभाको घोषित निर्वाचन सुनिश्चित गर्न विघटित संविधान सभाको सभासद रहेका सबै दलहरूको सर्वदलीय बैठक आयोजना गर्न नेपाल सरकारलाई अनुरोध गर्ने ।

३. भावि संविधानका आधारभूत सिद्धान्तका विविध पक्षमा छलफल अघि बढाई विगत संविधान सभामा भएका सहमति समेतका आधारमा आवश्यक सहमति कायम गर्न अधिकतम प्रयत्न गर्ने ।

४. विदेशमा रहेका नेपाली नागरिकहरूलाई मतदानको अधिकार प्रदान गर्ने सन्दर्भमा यथासमय आवश्यक कानूनी व्यवस्था गरी सोको प्रक्रिया थालनी गर्ने ।

५. उपरोक्त सहमतिका आधारमा सङ्घीय समाजवादी पार्टी, नेपालद्वारा घोषित आन्दोलन फिर्ता लिई २०७० साल मङ्सिर ४ गते हुने निर्वाचनमा सहभागी हुने ।

अशोक राई
सङ्घीय समाजवादी पार्टी,

रामचन्द्र पौडेल
अध्यक्ष संयोजकको तर्फबाट
उच्चस्तरीय राजनीतिक समिति