काठमाडौं/ छोराको हत्यारालाई कारबाहीको माग गर्दै आमरण अनशनमा बसेका गोरखा फुजेलका नन्दप्रसाद र गंगामाया अधिकारीको अनशन तोडाउने सरकारको प्रयास आज पनि असफल भएको छ ।

अधिकारी दम्पतीले दोषीलाई पक्राउ गरी कारबाही नगरेसम्म अनशन नतोड्ने अडान दोहोर्‍याएपछि अनशन तोडाउन वीर अस्पताल गएको सरकारी टोली त्यसै फर्किएको छ । अधिकारी दम्पतीलाई अनशन तोडाउन प्रधानमन्त्री कार्यालयका सचिव कृष्णहरि बाँस्कोटा, गृहसचिव नवीन घिमिरे, प्रहरी महानिरीक्षक कुवेरसिंह रानालगायतका अधिकारी बिहान वीर अस्पताल गएका थिए ।

सर्वोच्च अदालतको आदेशबारे अधिकारी दम्पतीलाई जानकारी गराउँदै घटनाबारे अनुसन्धान जारी रहेको र दोषीमाथि कारबाही हुने भएकाले अनशन तोड्न आग्रह गरिएको प्रधानमन्त्री कार्यालयका सचिव कृष्णहरि बास्कोटाले जानकारी दिनुभयो ।

तर, अधिकारी दम्पतीले भने कम्तीमा एकजनालाई पक्राउ गरी कारबाही सुरु गरेर अनशन तोडाउन आउन सुझाब दिएका थिए । तपाईंहरू कम्तीमा एकजनालाई मात्रै भए पनि पक्राउ गरेर आउनुस्, हामीले जुस होइन, दालभात नै खान्छौँ, अधिकारी दम्पतीको जवाफ थियो ।

छोरा कृष्णप्रसाद अधिकारीका हत्यारालाई कारबाहीको माग गर्दै अनशनमा बसेका अधिकारी दम्पति ४४ दिनदेखि वीर अस्पतालमा छन् । त्यसअघि केही दिन उनीहरू प्रधानमन्त्रीनिवास अघि अनशनमा बसेका थिए । स्वास्थ्य अवस्था नाजुक बनेपछि उनीहरूलाई वीर अस्पताल लगिएको थियो ।

उनीहरूको स्वास्थ्य कमजोर भएको भन्दै जीवन रक्षाको आग्रहसहित परेको रिटमा सुनुवाइ गर्दैै सर्वोच्च अदालतले हिजो अनुसन्धान प्रगतिविवरण सार्वजनिक गर्दै जीवन रक्षाका लागि जबरजस्ती भए पनि खाना खुवाउन विपक्षीका नाममा आदेश दिएको थियो ।

द्वन्द्वका मुद्दा ब्युँताए चुप लाग्दैनौँ : प्रचण्ड
काठमाडौं, १९ भदौ/ एकीकृत नेकपा माओवादीका अध्यक्ष पुष्पकमल दाहाल प्रचण्डले द्वन्द्वकालका मुद्दा ब्युँताउने काम भएर आफूहरू चुप लागेर नबस्ने चेतावनी दिनुभएको छ । ललितपुरको खन्ना गार्मेन्टमा आयोजित कार्यकर्ता प्रशिक्षण कार्यक्रममा प्रचण्डले जनयुद्धकालीन मुद्दालाई उचालेर संविधानसभाको निर्वाचन भाड्न खोजिएको आरोप लगाउनुभयो ।

द्वन्द्वकालकामा भएका घटनाहरूको एकपछि अर्को गर्दै मुद्दा उल्ट्याउने हो भने १५ हजार नागरिकको हत्या गरेको अभियोगमा कांग्रेस र एमालेका नेतालाई पनि मुद्दा चलाउनुपर्ने प्रचण्डको तर्क थियो । अध्यक्ष प्रचण्डले संविधानसभा निर्वाचनलाई अन्य सामान्य निर्वाचनको रूपमा लिएर त्यसलाई असफल पार्नु भनेको मुलुकलाई नै असफल बनाउनु भएको बताउनुभयो ।

निर्वाचन भाड्ने ग्राइन्ड डिजाइन : प्रवक्ता सापकोटा
एमाओवादीका प्रवक्ता अग्नि सापकोटाले निर्वाचन भाँड्ने ग्राइन्ड डिजाइनरहरूले अनशन जारी राख्न अधिकारी दम्पतीलाई उकासेको आरोप लगाउनुभएको छ । राजधानीमा गरिएको साक्षात्कारमा उहाँले परिवर्तनका विरोधीहरूले आन्दोलनबाट प्राप्त उपलब्धि निष्फल बनाउन प्रयास गर्दै आए पनि नसकेपछि अहिले चुनावको मुखमा अधिकारी दम्पतीलाई उकासेको आरोप लगाउनुभएको हो ।

द्वन्द्वकालका घटनालाई लिएर सबैलाई कारबाही गर्दै जाने हो भने तत्कालीन प्रधानमन्त्री शेरबहादुर देउवा, तत्कालीन गृहराज्यमन्त्री देवेन्द्रराज कँडेल पनि जेल जान तयार हुनुपर्ने उहाँको भनाइ छ ।

‘जीवन रक्षा गर्नु राज्यको कर्तव्य’
कार्यक्रममा नेपाली कांग्रेसका नेता अर्जुननरसिंह केसीले अधिकारी दम्पतीको जीवन रक्षा गर्नु राज्यको कर्तव्य भएकाले दोषीमाथिको कारबाही प्रक्रिया अघि बढाउनुपर्ने बताउनुभयो । अधिकारी दम्पतीको अनशनले अन्तर्राष्ट्रियजगतमै दलहरूको छविलाई कमजोर बनाएको भन्दै पछि सत्य निरुपण आयोगले हेर्ने गरी अहिले कारबाही प्रक्रिया अगाडि बढाउनुपर्ने उहाँले बताउनुभयो ।

यो पनि पढ्नुहोस् ।