काठमाडौं/ नेपालका लागि नवनियुक्त भारतीय राजदूत रञ्जित रेले आजदेखि औपचारिक रूपमा कार्यभार सम्हाल्नु भएको छ ।

उहाँले आज राष्ट्रपति डा. रामवरण यादवलाई ओहोदाको प्रमाणपत्र बुझाउनुभएको हो । नेपालका लागि भारतीय राजदूतका रुपमा रे सोमबार काठमाडौं आइपुग्नुभएको थियो । भारतीय विदेश मन्त्रालयले गत १२ असारमा रेलाई नेपालका नयाँ राजदूतका रूपमा नियुक्त गरेको थियो । नेपालका लागि भारतीय राजदूत जयन्त प्रसाद आफ्नो दुई वर्षे कार्यकाल पूरा गरी स्वदेश फर्किएपछि नयाँ राजदूत रे काठमाडौं आउनुभएको हो ।

रेले दिल्ली स्कुल अफ इकोनोमिक्सबाट अर्थशास्त्रमा पोस्ट ग्राजुएट गर्नुभएको छ । उहाँले सन् १९७८ देखि सन् १९८० सम्म दिल्लीको सेन्ट स्टेफेन कलेजमा प्राध्यापन गर्नुभएको थियो । नेपालका लागि नवनियुक्त राजदूत रेले जनआन्दोलन २०६२/६३ का बेला भारतको विदेश मन्त्रालयमा रहेर नेपाल–भुटान मामिला हेर्ने सहसचिवका रूपमा काम गरिसक्नुभएको छ ।