आक्रमणप्रति महासंघको आपत्ति
भोला थापा क्षेत्री, दोहा/ राजधानी दैनिकका समाचार सम्पादक गणेश बस्नेतमाथिको आक्रमणप्रति नेपाल पत्रकार महासंघ कतार शाखाले आपत्ति जनाएको छ ।
ललितपुरको कुपन्डोलस्थित राजधानी दैनिकको कार्यालयबाट पत्रिकाको कामसकेर घर फर्कने क्रममा महासंघका सभासदसमेत रहेका बस्नेतमाथि भएको आक्रमणप्रति महासंघ कतार शाखाले विज्ञप्तिमार्फत ध्यानाकर्षण भएको जनाएको हो ।
बस्नेतमाथि १४ बैसाखको राति पत्रिकाको काम सकेर घर फर्कने क्रममा बा.८च ४७०६ नम्बरको गाडीले पिछा गरी हत्या गर्ने प्रयास गरेको थियो । बस्नेत चढेको बा.१०प ४०६८ नम्बरको मोटरसाइकललाई थापाथली पुग्नेबित्तिकै चोकमा रोकिराखेको रातो प्लेटको उक्त गाडीले पिछा गरेर हत्या प्रयास गरेको थियो ।
मोटरसाइकलमा पछाडि बसेका अर्का राजधानीकर्मी भीम राई रहेका कारण उक्त गाडीले तेस्रोपटक ठक्कर दिने क्रममा मोटरसाइकल पेटीमाथि चढाएर आफू बाँच्न सफल भएको बस्नेतले जनाएका छन् ।
‘नेपालमा प्रेस र पत्रकारमाथि हुने कुनै पनि प्रकारको धम्की तथा आक्रमण प्रेस तथा अभिव्यक्ति स्वतन्त्रताविरोधी काम हो, यस्ता घटनाले पत्रकारको पेसागत स्वतन्त्रता र सुरक्षामा मात्रै होइन जनताले सत्यतथ्य समाचर प्राप्त गरेर सु–सूचित हुने अधिकारमाथि अंकुश लाग्न सक्छ,’ विज्ञप्तिमा उल्लेख छ ।
कतार शाखाले आक्रमणकारीको पहिचान भइसकेको अवस्थामा सरकारले तत्काल कडा कार्वाही गर्नुपर्ने मागसमेत गरेको छ ।
 |
0 comments
Write Down Your Responses
Thanks for Your comment.