विश्वको सर्वोच्च शिखर सगरमाथाको सर्वप्रथम आरोहण गर्ने नेपाली महिलाका पासाङ ल्हामु शेर्पा हुन् । उनको जन्म सोलुखुम्बु जिल्लाको चौरीखर्क, लुक्ला सुर्के-४ मा २०१७ साल मंसिरमा भएको थियो । पिता फूर्वा कितार शेर्पासाग १४ वर्षको कलिलो उमेरदेखि नै सानो कुम्लो बोकेर हिँड्न थालेकी थिइन । दुई दाजु, दुई भाइकी एकमात्र चेली पासाङ सन् १९७९ मा पूर्णरूपमा ट्रेकिङ पेशामा लागेकि हुन् ।

सन् १९९० र त्यसपछि लगातार दुई वर्ष सगरमाथा आरोहण गर्ने जमर्को असफल भइन । २०५० साल वैशाख १० गते दिउँसो २।१५ बजे सगरमाथाको चुचुरोमा नेपालको झण्डा गाडी सगरमाथा आरोहण गर्ने विश्वकी सत्रौँ र नेपालकी प्रथम महिला हुन पुगिन । आरोहणपछि फर्किने क्रममा पासाङको निधन भयो । मृत्युपश्चात् पासाङलाई 'सुप्रदिप्त मान्यवर नेपाल तारा'को विभूषण मिल्यो ।

उनको तस्वीर अंकित हुलाकटिकट प्रचलनमा ल्याइयो । पूर्वी नेपालको नाम्चे गाउँ विकास समितिअन्तर्गत रहेको ७ हजार ३ सय ५१ मिटर अग्लो 'जासम्बा' नामको चुचुरोलाई 'पासाङ ल्हामु चुली' नामकरण पनि गरियो । सरकारले २०५९ साल वैशाख १० गते पासाङ ल्हामु शेर्पालाई राष्ट्रिय विभूति घोषणा गर्‍यो । उनलाई राष्ट्रिय विभूति घोषणा गरेपपछि नेपालका राष्ट्रिय विभूतिको संख्या १५ पुगेको छ ।