http://www.nepalidarpan.com/

युवा संघको अध्यक्षमा फेरि बस्नेत

बुटवल, १५ फागुन/ नेकपा एमालेको भातृ संगठन युवा संघ नेपालको अध्यक्षमा महेश बस्नेत फेरि विजयी भएका छन् । आठौ महाधिवेशनमा भएको मतदानबाट आफ्ना प्रतिद्वन्द्वी नीरज आचार्यलाई केही मतले पराजित गर्दै बस्नेत फेरि अध्यक्षमा निर्वाचित भएका हुन् ।

उपाध्यक्ष र महासचिवसहित अधिकांश बस्नेत प्यानलकै विजयी भएको उपाध्यक्षमा निर्वाचित झपट रावलले बताए । पाँचजना उपाध्यक्षका लागि भएको मतदानमा बस्नेत प्यानलका ४ र आचार्य प्यानलका १ जना विजयी भएका छन् ।

उपाध्यक्षमा बस्नेत प्यानलबाट उमेदवारी दिएका झपट रावल, सूर्य ढकाल, निरु पाल, र दिलु पन्तले विजयका लागि पर्याप्त मत ल्याए पनि नारायणबहादुर बस्नेतले भने पराजय भोग्नुपर्‍यो ।

नीरज आचार्य प्यानलतर्फबाट राजु गुरुङ मात्रै अटाए, उनी भने बुटवलका स्थानीय हुन् । उपाध्यक्षका लागि आचार्य प्यानलका हिरा थोकर, लेखराज गौतम, राजेन्द्रमोहन श्रेष्ठ र रञ्जना सरकारले जितका लागि पर्याप्त भोट ल्याएनन् ।

१३५ केन्द्रीय समितिसहित लेखा र अनुशासन कमिटी गरी १६७ पदका लागि भएको निर्वाचनमा १,३८७ प्रतिनिधिले भोट हालेका थिए । १५ पदमा निर्विरोध चयन भएको र १५२ पदका लागि ३१९ जना उम्मेदवारबीच प्रतिस्पर्धा भएको थियो ।

बस्नेतको प्यानललाई नेता केपी शर्मा ओली र वरिष्ठ नेता माधवकुमार नेपालको समर्थन थियो भने आचार्यको प्यानललाई अध्यक्ष झलनाथ खनालको समर्थन थियो ।