हेटौँडा, २६ माघ/ पुरानै नेतृत्वलाई निरन्तरता दिँदै गत २० गतेदेखि मकवानपुरको हेटौँडामा जारी एकीकृत नेकपा माओवादीको महाधिवेशन सम्पन्न भएको छ ।

एकीकृत माओवादीको हेटाँैडा महाधिवेशनले पुष्पकमल दाहाल प्रचण्डको अध्यक्षतामै नयाँ केन्द्रीय समिति गठन गरेको हो । उपाध्यक्षहरूमा पनि डा. बाबुराम भट्टराई र नारायणकाजी श्रेष्ठलाई नै निरन्तरता दिएको छ ।

 

तर, सचिव पोष्टबहादुर बोगटीलाई भने महासचिवमा निर्वाचित गरिएको छ । महाधिवेशनले अमिक शेरचन संयोजक रहेको ६ सदस्यीय अनुशासन कमिटी गठन गरेको छ । बाँकी समानुपातिकमा पछि मनोनित गरिने एकीकृत माओवादीले जनाएको छ ।

पदाधिकारी सम्पन्न भएसँगै अध्यक्ष प्रचण्डले नयाँ कार्यसमितिको नाम सार्वजनिक गर्नुभएको हो । नवगठित केन्द्रीय समितिमा ९९ जना सदस्य रहेका छन् ।

२० गते सुरु भएको महाधिवेशन हिजो नै सकिने भए पनि केन्द्रीय सदस्यहरूको संख्याका विषयमा कुरा नमिल्दा एक दिन लम्बिएर आज सम्पन्न भएको हो ।